Во Офицерскиот дом во Битола денес се одржа Третата годишна средба на архитекти и архитекти урбанисти, организирана од Комората на овластени архитекти и инженери. Настанот се одвиваше под темата „Границите на архитектурата“ и собра стручњаци од земјата и странство за дискусија за улогата на архитектурата во современото општество.
На отворањето на средбата присуствуваа значајни имиња од областа, вклучувајќи ја и претседателката на комората, Кристинка Чулак, како и заменик министерката за транспорт Калтрина Зеколи Шаќири. Посебен акцент на настанот стави градоначалникот на Битола, Тони Коњановски, кој со својот говор ги поздрави присутните.
„Битола е град со богато културно наследство и архитектура која зборува за нашето минато, но и претставува основа за иднината. Вашите креации се многу повеќе од објекти – тие се просторите во кои живееме, работиме и соништаме,“ истакна Коњановски.
Тој ја потенцираше важноста на соработката меѓу локалната самоуправа и стручната фела, нагласувајќи дека архитектите и урбанистите имаат клучна улога во одржливиот развој на општините. За време на настанот, Комората му додели плакета на градоначалникот за неговиот придонес во афирмацијата на архитектурата и за проектите поврзани со Офицерскиот дом.
Во рамките на средбата, свое обраќање имаше и заменик-градоначалникот на Париз, Кристоф Најдовски, кој сподели искуства за планирањето на зелени површини и нивната улога во урбаното живеење.
Средбата, која продолжува и утре, отвора нови перспективи за креативен пристап во архитектурата, а Битола повторно се докажува како центар за споделување идеи и градење визии за иднината.
