Првиот вицепремиер и министер за животна средина и просторно планирање, Изет Меџити, денеска оствари работна средба со делегација од Канцеларијата на Обединетите нации за проектни услуги – УНОПС, предводена од регионалниот директор за Европа и Централна Азија, Тим Ларднер. Оваа средба се одржа во рамки на официјалната посета на Ларднер на земјите од Западен Балкан, со цел зајакнување на соработката и поддршката на регионални еколошки иницијативи.
Меџити изрази благодарност за долгогодишната соработка со УНОПС и нивната поддршка во реализацијата на важни еколошки проекти, како што е проектот „Чист воздух“, кој има за цел да го подобри квалитетот на воздухот во Северна Македонија. „Соработката со УНОПС ни овозможува ефикасно да се справуваме со еколошките предизвици во нашата земја“, изјави Меџити.
Како позитивен пример за соработката, Меџити го истакна проектот за санација на депонијата со линдан во поранешната фабрика ОХИС. Тој најави дека ваквите практики ќе се продолжат и на други локации со историско загадување, како што се Југохром и други индустриски објекти.
Меџити потенцираше дека партнерството со УНОПС е од витално значење за идните проекти за заштита на животната средина и подобрување на животниот квалитет во Северна Македонија.
