Една недела пред истекот на Есенската потрошувачка кошничка со која Владата се обиде да го спречи дивеењето на цените и ја ограничени профитната маржа за основните прехранбени производи, министерката за финансии Гордана Димитриеска Кочоска, останува на ставот дека државните институции немаат капацитет да го следат спроведувањето на мерката.
Во интервју за Гласот на Америка, на прашањето зошто е против замрзнување на тргоските маржи, вели дека станува збор за сложена методологија на која институциите и кадарот не можат да одговорат.
-НЕ СЕ ИНСТИТУЦИИТЕ СО СООДВЕТНО НИВО НА КВАЛИТЕТ. КОГА ЌЕ БИДАТ, МОЖЕМЕ ДА ЗБОРУВАМЕ ЗА ВАКВО НЕШТО, ЗАТОА ШТО АКО НЕМАТЕ СООДВЕТНО НИВО НА КВАЛИТЕТ ТОГАШ МЕРКАТА РАЗЛИЧНО ЌЕ БИДЕ ТРЕТИРАНА ОД РАЗЛИЧНИ ИНСПЕКТОРИ ПРИ КОНТРОЛИТЕ, ТОА МОЖЕ ДА НАПРАВИ ДОПОЛНИТЕЛНИ КОМПЛИКАЦИИ. ЈАС СУМ ЗА ПОЕДНОСТАВНИ МЕТОДОЛОГИИ, МОЖЕ НЕКОЈ ТИП НА ПОПУСТ, НА ОДРЕДЕНИ ПРИЗВОДИ ДА СЕ ДАДЕ ПОПУСТ, ТОА Е ПОЕДНОСТАВНА МЕТОДОЛОГИЈА, ВЕЛИ МИНИСТЕРКАТА ЗА ФИНАНСИИ ГОРДАНА ДИМИТРИЕСКА КОЧОСКА.
Според извештајот на ДПИ, биле изречени 30 прекршочни платни налози во вредност од над 4 милиони денари, при што биле казнети маркети во Скопје, Битола, Струмица, Валандово, Охрид, Куманово, Гостивар, Струга. Казните предизвикаа револт, па дури и најави за тужби, а директорот Горан Трајковски, рече дека нема да го поколебаат притисоците од некои производители кои одат со профитни маржи дури од 70 проценти, и повторно кажа за манипулациите на трговците со единиците мерки на производите.
– ТОЧНО Е ТОА ДЕКА СО ЗАКОН ВО МАКЕДОНИЈА Е ДОЗВОЛЕНО ПАКУВАЊЕ ОД 1КГ И ОД 1Л НА ЈОГУРТОТ, НО ОПШТО ПОЗНАТ ФАКТ Е ДЕКА 1КГ Е ПОМАЛКУ ОД 1Л И ИЗНЕСУВА 950 ДО 980МЛ. ОНА ШТО Е ЗАБЕЛЕЖАНО НА ТЕРЕН Е ДЕКА НА РАФТ КАЈ ТРГОВЦИТЕ НА МАЛО ИНСПЕКТОРИТЕ НАОЃААТ ПРОИЗВОД ОД 1КГ ЈОГУРТ, А НА ЕТИКЕТАТА ЗА ОЗНАЧУВАЊЕ ЦЕНИ СТОИ ДЕКА Е 1Л. СО ОВА СЕ ДОВЕДУВААТ ВО ЗАБЛУДА ПОТРОШУВАЧИТЕ, А НИЕ КАКО ИНСТИТУЦИЈА ТОА НЕМА ДА ГО ДОЗВОЛИМЕ“, НАВЕДУВА ГОРАН ТРАЈКОВСКИ, ДИРЕКТОР НА ДПИ.
Владината мерка за ограничување на бруто профитната маржа на дел од основните прехранбени производи до 10 проценти, завршува на крајот на месецот, по што трговците ќе можат слободно да ги формираат цените.
Извор: Телма
