Жителите на струшкото село Мислодежда со сопствени средства и со донации од печалбарите во странство го направија патот кој води кон нивното село. На иницијатива на месната заедница се реализира целата работа за отворањето на патот, почнувајќи од расчистување на местото до тампонирање. Државата им помогнала само за асфалтот.
„…Целата работа ја работеа печалбарите, уривање, тампонирање, учествуваа сите печалбари од селото. Собрани се околу 30.000 евра“, рече Идриз Мена-претседател на месна заедница во Мислодежда.
Неколку поединци ги отстапиле и своите приватни имоти за оваа намена. Таков е примерот со Авди Мена, кој отстапил цел хектар приватно земјиште.
„…За честа на селото, ви даваме земја, ги честиме и им благодариме на нашите поранешни соселани, бидејќи сега се преселивме во Ливада“, рече Авди Мена- сопственик на земјиштето каде што се гради патот.
Иако Миследежда е планинско село, располага со добра инфраструктура, но имаат друга мака.
„…Ако зборуваме за она што го засега селото, тоа е масовната миграција. Тоа е рана која го зафати општеството на нашата земја, но таа рана нè погодува и нас и ни остава очигледни последици“, рече Агим Мета-жител на Мислодежда.
Дека овде помошта од иселениците не е само преку летото, зборува и фактот што пензионерот од Швајцарија, Љуљзим Мена, секоја зима со свои средства и машини ги чисти патиштата низ струшките села од снег. Додека надлежните од државата стигнат до селата, тој веќе ги има исчистено патиштата.
