Владејачкото мнозинство на Ковачевски и Ахмети губи тројца пратеници и од 64-ца народни избраници ќе се сведе на минимални 61.
Поранешниот потпретседател на ДУИ и актуелен пратеник Изет Меџити, за Сител потврдува дека до собранискиот спикер Џафери заедно со пратениците: Реџепи и Коџаџику, ќе испрати писмо со кое ќе го извести дека повеќе не се дел од пратеничката група на Интегративците и дека тие тројца ќе дејствуваат опозициски.
Меџити од денеска попладне од скопски Чаир почнува и состаноци со своите приврзаници од т.е. огнена група за формирање на нова политичка партија – движење, кое како што вели треба да ја обедини албанската опозиција.
Сепак, Меџити не успеа во своите редови да ги придобие и останатите челници од огнената група со која веќе половина година бара реформи во ДУИ – градоначалникот на Сарај Блерим Беџети, како и поранешните функционери на ДУИ – Невзат Бејта и Муса Џафери. Тие како што вели Меџити се решиле да делуваат фракционерски во партијата на Ахмети и да се обидат одвнатре да ги поправат работите во ДУИ. За него, таков простор во ДУИ повеќе нема.
И покрај тоа што повеќе нема да е дел од власта, не се исклучува групата на Меџити во Собранието да ги поддржи најавените владини уставни измени, во знак на поддршка на европската интеграција и добар имиџ кај меѓуанродните претставници.
Владата на Ковачевски се соочи со криза во мнозинството пред Нова година, кога го изгуби Павле Трајанов, но најави и влез на Алијанса во Влада, што пак, беше причина од власта да отспаи Алтернатива на Гаши. По влезот на Таравари, мнозинствотот се стабилизира на 64 пратеника.
