По наредба на Јавното обвинителство за организиран криминал во соработка со Службата за борба против дрога на МУП, Управата за криминалистичка полиција, по повеќемесечна предистражна постапка на територијата на Белград, Ниш, Лазаревац, Суботица и Зрењанин денеска 13 лица се лишени од слобода и тоа: М.С, М.Л, М.Ј, Д.Ѓ, М.М, Д.Н, И.Ц, Р.Р, Ѓ.П, М.Р, В.С, М.П. и Ј.Л., поради постоење основи на сомнение дека сториле кривично дело неовластено производство и пуштање во промет на наркотични дроги.
Како што дознава Курир, меѓу нив се и челниците на „балканскиот картел“.
– Оваа организирана криминална група која ја сочинуваат 20 лица е осомничена дека била вмешана во меѓународна трговија со дрога. Имено, организаторите и членовите на оваа организирана криминална група се осомничени дека во текот на 2020 година учествувале во набавка и транспортирање на повеќе од шест тони кокаин од Јужна Америка во земјите од Западна Европа и Република Србија – соопшти Обвинителството за организиран криминал.
Меѓу уапсените се и членовите на криминалната група „Пинк Пантер“ Драган Ѓорѓевиќ Гага, Глигорије Пељевиќ (73), Младен Лазаревиќ, Мирослав Старчевиќ, познат како Џенерал, односно Деда.
-Србија со уште една успешна акција уште еднаш покажа и докажа дека е сигурен меѓународен партнер во борбата против организираниот и сите други видови криминал. Припадници на МВР по наредба на Обвинителството за организиран криминал со координација на Европол уапсија 13 лица, членови на организирана криминална група составена од неколку независни ќелии кои функционирале како балкански картел. Во соработка со Европол, Србија успеа да ги идентификува клучните цели на нејзината територија и да ги мапира нивните криминални активности низ светот. Станува збор за 5 тони кокаин запленети во Аруба, 1,2 тони во Белгија, 740 килограми во Ротердам, Холандија. На 20 претресени локации пронајдени се поголема сума пари и оружје. За успешна борба против организираниот криминал ни треба меѓународна акција – изјави шефот на УКП, Нинослав Чмолиќ.
