Министерот за економија, Крешник Бектеши информира дека имале конструктивен состанок со увозниците на овошје и зеленчук, по што било одлучено да се направи мала корекција на цените на овие производи.
-Генералниот нашиот увоз е од Турција, Грција, Србија и Албанија и повикувајќи се на новите цени во Царинската управа, наредниот вторник ќе ги ревидираме замрзнатите цени, нема да има поскап зеленчук и овошје од 100 денари за килограм. Ќе има многу мало намалување како највисока цена на овие производи, но никако нема да има цени од пред неколку дена кои се движеа до 130 и 140 денари, рече Бектеши на брифинг со новинарите.
Ние нема да отстапиме од вакви одлуки во време на криза. Месец април секогаш бил проблематичен за цените на овошје и зеленчук, затоа што немаме домашно производство. Нема да толерираме маржи од 100 и 200 отсто- додаде Бектеши.
Во однос на евентуалните двојни фактури од увозниците, министерот ги потсети дека затајување на данок над 10.000 евра е кривично дело и тој очекува дека Царинската управа докрај ќе постапи согласно нејзините надлежности.
