„Се случи нешто што засекогаш ќе остане во аналите на историјата на македонската интерпретативна уметност. Возбудата е дотолку поголема што добивме уште една димензија на проектот ‘Македонисимо’, кој Панде Шахов овој пат го обои во најразлични оркестарски бои, за поинаква звучна слика. Со желба изведбата да донесе уживање и за самиот оркестар, тој ја направи оркестрацијата многу внимателно. Во секој случај, незаборавно е чувството кога грмна тапанот и низ ‘Музикферајн’ се разлеаја корените на македонската нација“, изјави Трпчески, видно инспириран.
Неверојатен прием на пребирливата виенска публика на проектот Македонисимо на Симон Трпчески и Панде Шахов во престижниот музички центар од светско значење каде вчера беше одржана премиерка на проектот кој зборува за македонскиот музички фолклор.
Трпчески и другарите биле испратени со стоечки овации што не се случува често во Музикферајн.
„Музика која ги отвора ушите и срцата“, вака беше најавена светската премиера на оркестарската верзија на музичкиот проект „Македонисимо“ на Симон Трпчески и пријателите, која завчеравечер се одржа во најпрестижната светска концертна сала „Музикферајн“ во Виена, заедно со австрискиот Тонкунстлер оркестар и диригентот Јутака Садо од Јапонија. Беше привилегија да се присуствува на овој голем настан за македонската музичка уметност, посочи Здружението за култура и уметност „КултурОп“. Во изјавата за МРТ, Трпчески истакна дека концертот им донел на членовите на „Македонисимо квинтетот“ многу возбуда, среќа и гордост.
