Претседателот на Србија, Александар Вучиќ, даде интервју српската радио-телевизија откако вчера во Брисел се одржа новата рунда дијалог меѓу Белград и Приштина.
Вучиќ изјави дека вчера имало „еден разговор“ во Брисел и најави дека ќе има уште.
Имаше разговор, не се договоривме, ќе продолжиме да разговараме“, рече Вучиќ во емисијата „Таковска 10“ на РТС.
Тој изјави дека француско-германскиот план во меѓувреме, како што рече, станал европски предлог.
„Тој план на Европската унија дојде како идеја на Емануел Макрон и Олаф Шолц, тие донесоа хартија. Никого не прашаа, воопшто немаше можност за преговори, рекоа земи или остави… На луѓето секогаш им ја кажував вистината, а текстот на планот на ЕУ беше донесен без никаква можност за преговарање“, кажа тој.
Изјави и дека бил предупреден за последиците од неприфаќањето на предлогот, меѓу кои се и стопирањето на евроинтеграциите и директното повлекување на инвестициите.
„Дел од мојот тим очекуваше дека тие (ЕУ) ќе излезат со изјава дека (косовскиот премиер Албин) Курти не е подготвен за Заедницата на српските општини и знаев дека тоа нема да се случи, дека ќе лажираат, дека ќе има некаква избалансирана порака“, рече тој за вчерашната средба. „А луѓето велат дека ние не реагиравме на никаков начин и дека не сме дале приговори, што не е точно“, истакна Вучиќ.
Наведе и дека Србија на шест отпечатени страници доставила остар и темелен одговор, односно нон-пејпер одговор на европскиот предлог. Додаде дека нон-пејперот ќе замине во историјата и дека „се знае што е одбиено“.
„Кога зборувам за ова, тие се вратија со козметички промени и рекоа или земаш или не. Сакам да им порачам на сите граѓани, особено на Србите. Да, мислам дека е важно да се разговара“, изјави Вучиќ.
Вучиќ изјави дека во Минхен им рекол на Макрон и Шолц дека не е можно да се разговара за признавање и влез на Косово во Обединетите нации.
„Беше или да се остане во разговорите или да се напушти се и да се заврши како во деведесеттите со целосен економски колапс, реков дека Србија е подготвена да работи на спроведување на многу работи од планот“, рече Вучиќ.
„Зошто мислите дека не потпишав ништо, а што рекоа дека ќе потпишам? Имате изјава, се изненадив во Собранието, францускиот државјанин Милош Јовановиќ на Инстаграм објави дека сум предавник, кој сака да го потпише отцепувањето на Косово. Два дена подоцна ништо не беше потпишано во Брисел“, рече Вучиќ.
Претседателот на Србија изјави и дека белградските медиуми објавиле делови од европскиот предлог.
„Велам дека немам што да кријам, ова ни е поставено: „Или сакаш или не“. Изјавата на Борел е многу нејасна, зборував за концепт или рамка. Подготвени сме да разговараме за сите теми, а тоа би довело до нормализација“, рече Вучиќ.
Претседателот на Србија рече и дека не се крие никаков договор и дека секој постигнат е јавно објавен, а може да се најдат на веб-страницата на Канцеларијата за Косово и Метохија.
„Нема тајна, преку глава ми е од овие приказни дека не знам што пишува во договорот од Брисел или Вашингтон“, рече тој.
Тој рече дека Србија дала свое мислење за европскиот предлог и оти „ништо не е сменето“, односно направени се козметички корекции.
