„Универзитетски професори, историчари, меѓународноправни експерти и дипломати забележуваат дека постои добра координација на релацијата Приштина – Скопје – Тирана и дека ништо не е случајно ниту кажано ниту направено, па и во врска со „Заедница на албански општини“ во Македонија. Зад сè се препознава големоалбанската кауза, која на Балканот не признава државни граници поинакви од оние што се утврдени во 1913 година и делумно реализирани за време на Втората светска војна.“ – се вели во анализата со наслов „Ѝ намигнува ли некој дискретно на Софија?“, која ја објави весникот „Нова Македонија“.
Темпирани повици за формирање „Заедница на албански општини“ во Македонија
Покрај другото, во анализата пишува: Не стивнуваат реакциите кај македонската јавност, но и во соседството, по последното барање на сега опозициската партија Алтернатива да се формира заедница на албански општини во Македонија по урнекот на Заедницата на српски општини во Косово. Целата ситуација будно ја следи и официјална Софија, која сигурно нема да седи со скрстени раце ако дојде до реализација на ваквата идеја и затоа барањето за внесување на Бугарите во македонскиот устав не е нималку наивно, како што некој сака да го прикаже.
„Нашиве заблудени политичари никако да сфатат дека историјата ни се повторува, само сега малку поинаку спакувана. Албанците и Бугарите работат заедно на разнебитување на Македонија, и тоа токму во границите како што била поделена за време на Втората светска војна.“ – смета историчарот Тодор Чепреганов.
Изјавите на министерот за економија Крешник Бектеши во Тирана дека тој не е македонски министер, лобирањето на шефот на дипломатијата Бујар Османи за признавање на Косово, зачестените „седенки“ на лидерите на албанските политички партии од земјава во Тирана јасно покажуваат што е нивен приоритет, а тој приоритет никако не се вика Македонија. Во време кога државата се соочува со отворен фронтален напад од соседна Бугарија, користењето на сопствената држава како алатка за решавање на проблемите во некои туѓи дворови може да донесе проблеми и во сопствениот двор.
