Илјадници деца и верници во 62 градови и населени места во Македонија денеска чекореа во бадниковите поворки на радоста, пеејќи ја ангелската песна која го најавува Христовото раѓање.
Најмасовната бадникова манифестација се одржува во Скопје. Почна со празничен концерт на Градскиот плоштад „Македонија“, а потоа бадниковата поворка тргна преку Камниот мост кон Соборниот храм „Св.Климент Охридски“, каде коледарчињата беа дочекани и дарувани од архиепископот г.г. Стефан.
На манифестацијата пред Соборниот храм, беа упатени пораки за добро здравје, благосостојба, среќа и душевен мир во новата година одградоначалничката на Град Скопје Данела Арсовска, градоначалникот на Општина Центар Горан Герасимовски, здравичарот Иванчо Стефков, бадникарскиот кум за 2023 година Мојсо Мојсовски и кумовите Драган Спасов Дац и Александар Митевски.
– Како вчера да беше кога пред точно 30 години за првпат го почувствуваме гостопримството на светите лица во Соборниот храм „Свети Климент Охридски“. Добивме претходно благослов од г.г. Михаил кој ни го даде името Бадникари. Беше малку порано отколку што е сега и пред објектот имаше многу малку луѓе за ралзика од сега. Нашата приказна е мошне долга и интересна. Дозволете на сите да ви ја честитам новата година и да ви посакам се што е лошо да остане зад вас, поминете ги добро празничните денови, порача новиот бадникарски кум, Мојсо Мојсовски.
ФОТО: П.Стојановски
