Турската полиција уапси лице осомничено дека ја поставило бомбата што вчера експлодираше во пешачката зона во центарот на Истанбул, при што загинаа најмалку шест, а се повредени десетици луѓе.
Бомбата експлодираше вчера околу 16:20 часот по локално време на авенијата Истиклал, улица со бројни кафулиња, ресторани, кина и продавници. Според моментално достапните податоци, најмалку шест лица загинаа во експлозијата, а 81 лице е повредено, од кои двајца потешко.
Како што јави Си-ен-ен Турк, полицијата го соопшти идентитетот на уапсеното лице. Станува збор за, како што велат, жена од Сирија по име Ахлам Албашир. Тие тврдат дека за време на испрашувањето ја признала својата поврзаност со Курдистанската работничка партија. Се појави и снимка од моментот на апсење.
Утринава министерот за внатрешни работи Сулејман Сојлу, според извештајот на државната телевизија ТРТ, изјави дека полицијата го уапсила лицето кое ја поставило бомбата. Осомниченото лице е поврзано со забранетата Курдистанска работничка партија (ПКК), а министерот Сојлу се закани со одмазда, јави ТРТ.
Во ЕУ и во САД, ПКК има статус на терористичка организација, забележува агенцијата дпа. Авенијата Истиклал беше цел на терористички напад и во 2016 година, кога бомбаш самоубиец уби четири лица, а рани 39. Турската влада тогаш објави дека напаѓачот е поврзан со Исламската држава, но таа не ја презеде одговорноста, посочува дпа.
Турскиот министер за правда Бекир Боздаг вчера за провладината телевизија А Хабер изјави дека жената која околу 40 минути седела на клупа во близина на местото на експлозијата е под истрага. Експлозијата се случи само неколку минути по нејзиното заминување.
