Селото Салто де Кастро, кое се наоѓа на северозападот на Шпанија, се нуди на продажба по цена од 260.000 евра.
Селото се наоѓа на границата меѓу Шпанија и Португалија и е на три часа возење од Мадрид. Селото има многу згради кои вообичаено може да се најдат во мал шпански град, има 44 домови, хотел, црква, училиште, градски базен, па дури и бараки кои биле користени за сместување на цивилната стража.
Сепак, селото нема жители бидејќи било напуштено пред повеќе од три децении. Сегашниот сопственик го купил на почетокот на 2000-тите со намера да го претвори во туристичка локација, но неговиот план бил срушен поради кризата во еврозоната.
-Сопственикот сонуваше да поседува хотел, но се е запрено. Неговата желба е таков проект да се оствари во иднина, изјави Рони Родригез од компанијата Ројал Инвест, која го застапува сегашниот сопственик.
-Го продавам селото бидејќи живеам во град и не можам да го одржувам, вели сопственикот кој има околу осумдесет години.
Објавениот оглас з апродажбата привлекол голем број заинтересирани и само за неколку дена се регистрирани над 50.000 посети, а околу 300 луѓе директно ја покажале својата желба за купување. Барањата доаѓаат од Русија, Франција, Белгија и Велика Британија, а една од заинтересираните веќе дала аванс за купувањето.
Селото Салто де Кастро го изградила компанија, која произведува електрична енергија, а во неа требало да бидат сместени семејствата на работниците кои работеле во близина на акумулацијата во почетокот на педесеттите години на минатиот век. Но, по завршувањето на проектот, семејствата се иселиле, па селото било целосно напуштено кон крајот на осумдесеттите.
Претходно селото беше понудено на продажба по цена од 6,5 милиони евра, но никој не се огласил. Со текот на времето било вандализирано, па бараната сума сега е драстично помала. Денеска се продава за 260.000 евра.
На идниот сопственик ќе му требаат повеќе пари за уредување на селото и привлекување посетители, а се проценува дека е потребна инвестиција од околу 2 милиони евра за да биде 100 отсто функционално и исплатливо.
