Старлетата Сораја Вучелиќ се бори за живот, откако викендов имала тешка сообраќајка во Албанија, пренесоа локалните медиуми. Таа има скршеници на ребрата и внатрешно крварење, поради што од Албанија била префрлена во Хрватска на итна операција.
„Лекарите од саботата се борат за животот на Сораја. Веднаш по несреќата била префрлена во приватна клиника во Албанија каде и била оперирана. Сепак, вчера состојбата ѝ се влошила и почнала внатрешно да крвари. Семејството и пријателите решиле да ја префрлат во Хрватска на нова операција“, раскажал за Информер извор близок на Сораја.
Тој открил дека старлетата со пријателка оделе од Косово за Албанија.
„Таа управувала џип мерцедес во кој удрило комбе. Од силината на ударот Сораја за малку ќе прелетала низ возачкото седиште. Таа со градниот кош удрила во воланот при што ги скршила ребрата и ги повредила внатрешните органи. Колата е целосно уништена. Пожарникарите морале да ги извлечат Сораја и нејзината пријателка од џипот. Итната помош брзо пристигнала на местото на настанот и ја нашла во несвест. Ја приклучиле на инфузија и ја однеле во приватна клиника. Лекарите детално ја прегледале и утврдиле дека има скршеници на ребрата, повреди на вратот, белите дробови и стомакот, па затоа била оперирана. Но, вчера ненадејно се појави ново крварење и таа мора да оди на нова интервенција“, рекол истиот извор за „Информер“.
