ЕВН тврди дека вистинскиот период за кој се плаќа струја се наоѓа на задната страна на сметката, а датумите кои се на нејзината предна страна се датуми на неделата кога се чита броилото.
Дали се поткраднуваат граѓаните во сметките за струја? Граѓани велат дека поради тоа што има поклопување на денови од ист месец во сметките за струја двапати плаќаат за исти денови во месецот. ЕВН, пак, тврди дека нема никакво поткраднување во сметките бидејќи на предната страна од сметката што ја добиваат граѓаните е пишана неделата во која се читаат струјомерите. Вистинскиот период за кој се однесува сметката е на задната страна на фактурата.
Откако се зголеми цената на струјата голем број граѓани се жалат дека нивните сметки се повисоки од потрошената струја бидејќи двапати плаќаат за исти денови во месецот. Загриженоста на граѓаните се прелеа и социјалните мрежи и во медиумите. Коментарите одат до таму што се вели дека годишно на ваков начин на граѓаните им се крадат високи суми пари.
– Ова е кражба, двапати ми наплатуваат за исти денови. Во сметката јасно се гледа дека има преклопување на денови. Така ми наплатуваат над 1.300 денари повеќе секој месец – вели граѓанин.
ЕВН, пак, тврди дека граѓаните се доведени во заблуда со тоа што мислат дека на предната страна на фактурата се гледа периодот на пресметка на потрошената електрична енергија. Вистинскиот период за кој се плаќа струја се наоѓа на задната страна на сметката, а датумите кои се на нејзината предна страна се датуми на неделата кога се чита броилото.
– Датумите на предната страна на фактурата се всушност датуми на отчитувачката недела на корисникот, односно во која група на отчитувачки период припаѓа корисникот. Додека датумите за реалното фактурирање на потрошувачката се наоѓаат на задната страна на фактурата. Реално отчитаните датуми никогаш не се поклопуваат со отчитаните датуми во претходниот месец. Овој податок на прочитана потрошувачка се наоѓа во горниот дел на задната страна, веднаш до ставката: Податоци од броило – велат од ЕВН.
Оттаму појаснуваат дека датумите на предната страна фактурата се од информативен карактер во која отчитувачка група припаѓа корисникот, а на втората страна се наоѓаат податоците врз база на кои се прави пресметката на фактурата.
– Отчитувањето на клиентите на ЕВН Хоме со тарифа домаќинства и мали потрошувачи се врши по календарски недели. На задната страна на фактурата, веднаш до ставката „Податоци од броило“ корисниците може да ги најдат точните датуми за кои им е пресметана потрошувачката на електрична енергија. Овие датуми никогаш не се поклопуваат со денови од претходниот месец и со тоа се подразбира дека не постои ни најмала можност да се соочуваат со двојно плаќање. Значи нема двојна наплата и нема преклопување на датуми на отчитување – појаснуваат од ЕВН.
Според ова, пред да помислите дека сте поткраднати, погледнете ја и задната страна на фактурата за потрошена електрична енергија. Најдобро е да го проверите броилото по отчитувањето и да направите споредба со фактурираните киловати. Односно да ги споредите со потрошените киловати од минатиот месец.
izvor Plus info
