Логоата на Гучи, Версаче, Диор, Зара, Луј Витон се дел од ѕидовите на реновираните тоалети на основното училиште „Климент Охридски“ во Прилеп. Директорот на училиштето Ахил Јаков на својот фејсбук-профил веќе се пофали дека ова се најмодерноите тоалети во Македонија. Дел од родителите веќе реагираат за тоа на кои вредности се учат нивните деца.
Тоалетите, како дел од проектите на локалната самоуправа, се навистина реновирани во оригинален стил. На ѕидовите се насликани ликови и јунаци од цртани филмови. Она што најмногу предизвика внимание и коментари се цртежите на женските тоалети со логоата на брендовите Гучи, Версаче, Диор, Зара, Луј Витон.
За овој дел, коментарите се дека е ова кич, дел од родителите прашуваат дали е ова најсоодветниот дизајн за тоалет за ученици од едно основно училиште, која е тука вредноста која им се поставува како цел на учениците…
