На собраниската седница која трае и по работното време се случи хаос.
Координаторот на пратеничката група, Никола Мицевски бараше процедурално, што не му беше одобрено од спикерот Џафери. Тој побара да се гласа за дневниот ред, откако претходно им даде збор на двајца пратеници на ВМРО-ДПМНЕ, кои не излегоа на говорницата бидејќи се бараше процедурално.
После сето тоа, Џафери му кажа на Мицевски да се тргне од неговиот пулт ако не е за тепање.
„Не ме допирајте“, рече Мицевски, по што Џафери му кажа да се тргне и да оди на говорница и го стави дневниот ред на гласање, по што Мицевски му дофрли: „Брука си, срамота, кој дневен ред“.
Потоа Џафери му порача на Мицевски: „Правете што сакате, до мене не се доближувајте“. Потоа Џафери почна констатираше дека за дневниот ред се изјасниле 61 пратеник, а против 39 пратеници.
Мицевски и покрај се остана на пултот кај Џафери за да бара процедурално, пренесува “A1On“.
„Оди си на твоето место ако не си за тепање“, му кажа Џафери на Мицевски.
Инаку, Мицевски бараше процедурално за да се утврди бројот на пратеници, а Џафери го направи тоа дури откако пратениците гласаа.
„Можете да не сметате за диктатура, може за демократија, процедурата е таа. Ова е деловникот“, порача Џафери.
Мицевски потоа излезе на говорницата, но неговиот микрофон беше исклучен. Откако беше вклучен, тој кажа:
„Пред да го ставите дневниот ред на гласање донесовте одлука за промена на член од деловникот. Ова ќе се изучува како негативна практика на правни факултети“, рече Мицевски.
На тоа Џафери одговори: „Нека се изучува, треба да се изучува“.
„Јас барав да зборувам, а не вие да дискутирате со мене. Кога е бал, нека е маскенбал, да тераме до сабајле“, порача на крајот Мицевски.
