Министерката за труд и социјална политика, Јагода Шахпаска им порача на родителите на ученици од основно и средно образование дека имаат прилика да ги купат потребните ИТ-уреди за следење на онлајн-настава за време на продолжениот викенд на 10, 11 и 12-ти октомври.
Оваа изјава на министерката е во најмала рака поигрување со народот. Родителите деновиве се на големи маки со платформата која не е стабилна, со неизвесноста за тоа како нивните деца ќе следат настава. Дополнителен проблем е што голем дел од семејствата немаат компјутер кој им е неопходен за онлајн настава.
Компјутерите се скапи, а народот долго време е во финансиска криза. Претставници на Владата наместо да најдат начин да им помогнат на овие семејства, тие даваат нелогични изјави кои се навредливи и потценувачки за родителите.
Шахпаска одговарајќи на новинарско прашање зошто државата во четвртиот пакет на економски мерки не излезе со конкретна помош за купување на техничка опрема како компјутери и мобилни телефони заради онлајн наставата, таа рече дека токму купувањето во рамки на проектот „Викенд без ДДВ“ е можност за тоа.
-За време на „Викенд без ДДВ“ ќе може да се потрошат најмногу 30.000 денари во чии рамки може да влезе и таква опрема, а потоа на родителот ќе му се врати платениот данок, рече Шахпаска.
Данокот кој ќе му биде вратен на родителот е една незначителна сума, а остатокот сепак најголем дел од семејствата не се во можност да го платат. Со оваа владина мерка и со овој совет на министерката, родителите ќе можат да набават компјутер поевтин за само 5%!
