Почнувајќи од утре земјите од Балканскиот Полуостров ќе се соочат со големи априлски снегови и студови. Поточно во моментов од Арктикот кон нашиот дел од Европа започна да се спушта многу студен воздух кој ќе услови врнежи од снег во најголем дел од Балканот во текот на утрешниот ден.
Најмногу снег се очекува во делови од Босна и Херцеговина како и во Црна Гора каде снежната покривка понекаде ќе достигне и над 30 сантиметри, а снег се очекува да паѓа и во Словенија, Хрватска и соседна Србија.
Температурите ќе бидат далеку под просекот за овој дел од годината и наутро истите понекаде ширум Балканот ќе се спуштаат и до околу -10 степени, на планинските места дури и под -10 степени. Сето ова ќе биде проследено и со леден северен ветер.
Овој бран ќе пристигне и во Македонија но со тоа што ќе услови врнежи од дожд и тоа утре особено во југоисточните и во источните предели, додека во среда врнежите ќе се прошират на повеќе места. Истите на планините и на повисоките места, особено на северот ќе бидат од снег каде ќе се формира нова снежна покривка.
Во среда кон крајот на денот и во вечерните часови поради продорот на студената воздушна маса од север, услови за врнежи од снег ќе има понекаде и на пониските места, особено во западните предели. Ќе дува умерен до засилен ветер, најпрвин од југозападен и од западен, а потоа и од северен правец а температурите значително ќе опаднат и во среда ќе се искачуваат од 5 до 13 степени, меѓутоа кон крајот на денот и вечерта уште повеќе ќе опаѓаат.
Од четврток времето ќе се стабилизира, но наутро температурите на повеќе места ќе бидат под нулата со што ќе има појава на мраз. Истиот лошо ќе влијае особено врз земјоделските култури. Затоа земјоделците се советуваат со време да си ги заштитат своите земјоделски култури и посеви.
Утре повремени врнежи од дожд ќе има на повеќе места. На планините и на некои повисоки места врнежите ќе бидат од снег, додека кон крајот на денот и во вечерните часови поради продор на постудена воздушна маса од север, услови за послаби врнежи од снег ќе има и на некои пониски места, особено во западните предели. Ќе дува умерен до засилен ветер од западен правец, додека Долж Повардарието истиот ќе биде од северен правец. Максималните температури ќе се искачуваат во интервалот од 6 до 14 степени.
Од четврток ќе има стабилизирање на времето, додека утринските температури на повеќе места ќе се спуштаат под нулата.
За нови, детални и по потреба обновени метео информации, следете го официјалниот фејсбук профил на Славчо Попоски.
