Бројот на стогодишници во Италија постојано расте – годинава повеќе од 2.000 Италијанци ќе наполнат 100 години, најголемиот дел од нив жени, пишува Гардијан.
Според податоците на Италијанскиот завод за статистика, во земјата моментално живеат 23.548 лица постари од 100 години, во споредба со 21.211 минатата година. Од оние што годинава го одбележуваат овој јубилеј, 82,6% се жени. Жените доминираат и меѓу 724 лица постари од 105 години, како и меѓу 19 „суперстогодишници“ постари од 110 години.
Највозрасната Италијанка, Лучија Лаура Сандјенито од регионот Кампанија, ќе го прослави својот 115-ти роденден на 22 ноември, што ја прави третата најстара жена во Европа.
Медитеранската исхрана, силните семејни и општествени врски и стабилниот здравствен систем се сметаат за клучни фактори за долговечноста на Италијанците.
Но, демографските трендови претставуваат сериозен предизвик – населението забрзано старее, а наталитетот паѓа. Во 2024 година се родиле само 370.000 бебиња, најмал број од обединувањето на Италија во 1861 година.
