Израел доби согласност од САД, Египет и Катар да гаѓа цели на Хамас на израелската страна на таканаречената „жолта линија“, која ја дели зоната под израелска контрола од делот на Газа под фактичка власт на Хамас.
Оваа одлука следи по истекот на рокот за повлекување на борците на Хамас од источниот дел на Појасот Газа, според неименуван американски официјалник. Египет и Катар им дале рок од 24 часа на Хамас да се повлечат, кој истекол вечерва во 20 часот по локално време.
Според израелскиот портал, линијата на разграничување сè уште не е целосно воспоставена на теренот, па војниците не се секогаш сигурни каде точно минува, бидејќи е воспоставена само пред неколку недели како дел од договорот за прекин на огнот.
Турција, која исто така посредува во преговорите за прекин на огнот, не е вклучена во оваа одлука, со оглед на тоа што не сакаше да биде поврзана со „зелено светло“ за израелските напади врз Хамас.
