Високи претставници на Соединетите Американски Држави и Кина постигнаа прелиминарен договор за надминување на трговскиот спор околу царините, јавува Ројтерс. Средбата се одржа во Куала Лумпур, на маргините на регионалниот економски самит.
На разговорите учествуваа американскиот секретар за финансии Скот Бесент и трговскиот претставник Џејмисон Грир, како и кинескиот вицепремиер Хе Лифенг и главниот трговски преговарач Ли Ченганг.
„Мислам дека постигнавме суштинска рамка за двајцата лидери кои ќе се сретнат следниот четврток,“ изјави Бесент. Кинескиот претставник Ли Ченганг потврди дека е постигнат консензус, нагласувајќи дека разговорите биле „интензивни, но конструктивни“.
Прелиминарниот договор треба да помине низ внатрешни процедури за одобрување во двете земји. Петтата рунда трговски разговори беше насочена кон прашања како што се извозната контрола на ретки минерали и метали од Кина, како и американските царини за увоз на кинески производи.
Според најавите, американскиот претседател Доналд Трамп и кинескиот претседател Си Ѓинпинг ќе се сретнат следниот четврток во Јужна Кореја за финализирање на договорот.
