Американскиот претседател Доналд Трамп изјави дека нема намера да се сретне со рускиот претседател Владимир Путин сè додека не биде подготвен конкретен договор за мир меѓу Русија и Украина, со што би се ставил крај на војната што во февруари ќе влезе во својата петта година.
„Морам да знам дека ќе постигнеме договор. Нема да губам време“, изјави Трамп пред новинарите во авионот Air Force One за време на патувањето во Азија, пренесува Index.hr.
Претходно беше најавено дека двајцата лидери ќе се сретнат во Будимпешта за да разговараат за мировниот процес, но средбата никогаш не се одржа. „Секогаш сум имал одличен однос со Владимир Путин, но ова е многу разочарувачки“, додаде Трамп. Двајцата се сретнаа последен пат на 15 август на Алјаска, што тогаш беше оценето како продуктивен чекор кон постигнување мир.
Ескалација на нападите врз Украина
Во меѓувреме, руските напади врз Украина продолжуваат. Во ноќта меѓу петок и сабота, најмалку четири лица загинаа, а дваесет беа ранети во ракетни и беспилотни напади. Во Киев загинаа две лица, а 13 се повредени при напад со балистичка ракета, додека во Дњепропетровск животот го загубија уште две лица, а седум се повредени.
Украинскиот претседател Володимир Зеленски повторно побара од САД да ги прошири санкциите кон целиот руски нафтен сектор и да испорача ракети со долг дострел за возвратни удари. На средбата во Лондон, европските лидери ветија дополнителна воена помош за Украина.
Трамп подготвува нов пакет санкции против Русија
Според извори во Вашингтон, администрацијата на Трамп подготвува нов сет санкции насочени кон клучни сектори на руската економија, кои ќе бидат активирани ако Москва продолжи да го одложува мировниот процес. Санкциите би можеле да ги погодат рускиот банкарски сектор и инфраструктурата за транспорт на нафта.
Двајца американски функционери потврдиле дека Вашингтон разговара со европските партнери за можноста да се искористи замрзнатата руска имовина за финансирање на набавка на оружје за Киев.
„Ќе почекаме неколку недели за да ја видиме реакцијата на Русија на санкциите што ги воведовме пред три дена“, изјавил висок американски претставник за Reuters, додавајќи дека последните мерки веќе довеле до раст на цената на нафтата за повеќе од два долара и притисок врз купувачите во Кина и Индија.
Замрзнат мировен процес
Иако Путин и Трамп планирале состанок во Будимпешта, средбата е откажана, бидејќи, како што рече Трамп, „едноставно не ми се чинеше исправно во овој момент“.
Од Москва, рускиот изасланик Кирил Дмитриев изјави дека Русија, САД и Украина се блиску до дипломатско решение, но украинската страна нагласува дека нема да прифати територијални отстапки.
Портпаролката на украинската амбасада во Вашингтон, Халина Јусипјук, изјави дека новите американски санкции се чекор во вистинската насока. „Демонтажата на рускиот воен апарат е најхуман начин овој војна да заврши“, порача таа.
