НАТО го активира британскиот разурнувач HMS Duncan за да го пресретне и следи рускиот воен брод во текот на 48 часа низ британските води, во операција што е опишана како „прва во историјата“. Британскиот разурнувач, под команда на НАТО, го следеше рускиот разурнувач Vice-admiral Kulakov од Северното море до Ла Манш, со придружба на хеликоптер Wildcat.
Иако е вообичаено британските воени бродови да ги следат руските активности, учеството на НАТО во оваа операција претставува значаен развој настани поради растечките тензии со Москва.
„Разурнувачот Тип 45 користеше напредни сензори и системи за да го пресретне Kulakov во Северното море, следејќи го неговиот премин низ каналот кон островот Ushant покрај француската обала. Хеликоптерот Wildcat од 815-та поморска воздушна ескадрила обезбеди воздушна поддршка и контрола на бродот. Во координираната операција учествуваа три држави, вклучувајќи холандски NH90 и француска морнарица“, изјави портпаролот на Кралската морнарица.
Британскиот министер за одбрана Џон Хили изјави дека Велика Британија ќе го „зголеми“ својот одговор на руската агресија и додаде дека рускиот претседател Владимир Путин ја смета Велика Британија за „непријател број еден“ поради нејзината поддршка на Украина.
Министерот за вооружени сили Ал Карнс истакна дека Кралската морнарица е подготвена да одговори на секоја руска поморска активност и дека соработката со НАТО ја потврдува нивната солидарност и способност да се спротивстават на руските активности.
Операцијата се случува во време на загриженост поради руската „флота во сенка“ – цивилни бродови кои можат да се користат за лансирање дронови и хибридни напади во ЕУ, според извештај на Европската служба за надворешни работи. HMS Duncan е еден од два британски бродови приклучени на НАТО групата за северноевропски води, кои спроведуваат редовни патролирања за обезбедување на безбедноста на регионалните води.
