Американскиот претседател Доналд Трамп ги отфрли наводите на весникот Wall Street Journal, кој објави дека неговата администрација укинала клучно ограничување што ѝ забранувало на Украина да користи западни далекусежни ракети за напади на цели во Русија. Трамп изјави дека станува збор за „лажни вести“ и дека американската политика кон Украина останува непроменета.
Весникот претходно објави дека со укинувањето на ова ограничување, Киев би можел да ги засили нападите врз руските воени и индустриски цели. Според нив, промената настапила откако овластувањето за одобрување на вакви напади било пренесено од американскиот министер за одбрана Пит Хегсет на врховниот командант на американските сили во Европа, генерал Алексус Гринкевич.
Паралелно со овие извештаи, Украина соопшти дека користела британски крстосувачки ракети Storm Shadow за напад на фабрика во рускиот град Брјанск, каде што се произведуваат експлозиви и ракетно гориво. Нападот бил опишан како „успешен“, а украинската армија тврди дека го пробила рускиот противвоздушен штит.
Од Белата куќа реагираа со изјава дека „ова е војна која никогаш немаше да се случи доколку претседателот Трамп беше на власт тогаш“, нагласувајќи дека Трамп сега работи на постигнување мировен договор.
Американските власти не потврдија официјално никакви измени во правилата за користење на ракетите, а Пентагон не одговори на барањата за коментар. Украинскиот Генералштаб исто така не ја коментираше веста.
Според западни аналитичари, дури и да се дозволи поширока употреба на Storm Shadow, тоа не би значело голема промена на бојното поле, бидејќи тие имаат помал дострел од американските Tomahawk ракети, кои Киев сè уште ги бара.
Одлуката за евентуално укинување на ограничувањата, според WSJ, наводно била донесена пред неодамнешната средба меѓу Трамп и украинскиот претседател Володимир Зеленски во Белата куќа. Зеленски побарал испорака на Tomahawk ракети, но Трамп ја одбил иницијативата.
Вашингтон неодамна ѝ одобри на Украина продажба на 3.350 воздушни ракети ERAM со дострел до 450 километри, како и дополнителна помош со системите Atacms, но засега нема потврда дека тие ќе се користат за напади внатре во Русија.
Во заедничката изјава со европските сојузници, Зеленски најави засилување на притисокот врз руската економија и нејзината одбранбена индустрија „сè додека Путин не биде подготвен за мир“.
