Генерален штрајк во Брисел денеска прерасна во судири меѓу демонстрантите и полицијата. Според бриселската полиција, на протестот учествувале околу 80.000 лица, додека синдикатите тврдат дека бројот бил многу поголем, околу 140.000.
Откако дел од демонстрантите одбија да го напуштат местото на протестот, полицијата употреби водени топови и солзавец за да ги растера. Инцидентот резултираше со неколку апсења, а неколку повредени добија медицинска помош на самото место, објави „Бруселс Тајмс“.
Протестот е организиран од трите најголеми белгиски синдикати и е насочен против мерките и буџетските одлуки на федералната влада, кои според синдикатите, предизвикуваат „подолго и понапорно работење“ и чувство на неправда кај вработените во јавниот сектор.
