Катастрофална експлозија ја срамни со земја фабриката за експлозиви „Акстракт енергетски системс“ во американската сојузна држава Тенеси, при што, според најновите извештаи, животот го загубиле најмалку 19 лица. Властите потврдија дека нема преживеани.
Инцидентот се случил во петокот, а експлозијата била толку силна што се почувствувала на повеќе од 15 милји (околу 24 километри) оддалеченост. Остатоци од фабриката биле расфрлани на површина поголема од половина милја, изјави шерифот на округот Хамфрис, Крис Дејвис.
„Не се пронајдени преживеани. Се работи за сцена од најлошите што некогаш сум ги видел“, изјави Дејвис на прес-конференција, додавајќи дека спасувачките екипи и понатаму пребаруваат низ остатоците за да ги идентификуваат жртвите.
Воздушните снимки прикажуваат дека од фабриката останале само извиткани парчиња метал и изгорени остатоци од возила. Компанијата „Акстракт енергетски системс“ произведувала и истражувала експлозиви за воени потреби.
Шерифот Дејвис истакна дека истрагата е во тек и дека на местото на настанот работат федерални и локални истражители. „Ова не е како несреќа или торнадо. Ова е сцена на експлозија — ние се справуваме со остатоци“, рече тој.
