Украинската престолнина Киев утрово беше потоната во темнина по масовен руски напад врз критичната инфраструктура на градот. Според украинските воздухопловни сили, руските сили употребиле балистички ракети и дронови-камикази, предизвикувајќи големи оштетувања и прекин во снабдувањето со електрична енергија и вода.
Градоначалникот на Киев, Виталиј Кличко, изјави дека во нападот се повредени девет лица, од кои пет се хоспитализирани. Тој потврди дека делови од источниот брег на реката Днепар останале без струја и вода.
На социјалните мрежи се појавија фотографии и видеа од запалени станови, додека пожарникарите се обидуваа да го локализираат пожарот. Фрагменти од соборени дронови паднале на неколку локации во градот. Новинарите на АФП јавуваат дека во текот на утрото се слушнале повеќе силни експлозии низ Киев.
„Главниот град е под масовен напад со балистички ракети и ударни беспилотни летала. Ги повикуваме граѓаните да останат во засолништа“, соопштија украинските воздухопловни сили.
Масовен напад врз енергетската мрежа
Министерката за енергетика Свитлана Гринчук потврди дека нападите биле насочени кон електричната инфраструктура на земјата.
„Енергетските експерти преземаат сè што е потребно за да се минимизираат последиците. Штом условите дозволат, ќе започне проценка на штетата и реконструкција“, објави таа на Фејсбук.
Во последните недели, Москва значително ги засили воздушните напади врз украинските енергетски постројки и железнички линии, продолжувајќи ја стратегијата што ја користеше и во изминатите три зими — оставајќи ги Украинците без греење во текот на студените месеци.
Напади и во други региони
Покрај Киев, руските сили ја нападнаа и областа Запорожје, каде што, според локалните власти, биле истрелани седум дрона. Во нападот загинало седумгодишно дете, а најмалку три лица се повредени, потврди Иван Федоров, началник на регионалната воена администрација.
Поради страв од можно лансирање на хиперсонична ракета „Кинжал“, Украина прогласи општа воздушна тревога низ целата територија.
Реакција на Зеленски
Украинскиот претседател Володимир Зеленски изјави дека Москва се обидува да „создаде хаос и да изврши психолошки притисок“ врз населението преку напади врз енергетски и транспортни системи. Тој предупреди дека гасната инфраструктура е веќе сериозно оптоварена, а новите напади може да ја натераат Украина да зголеми увоз на енергија.
Истовремено, Украина ги интензивира своите напади врз руска територија, особено со беспилотни летала и ракети. Според Зеленски, овие акции „веќе даваат резултати“, влијаејќи на снабдувањето со гориво и зголемувајќи ги цените на нафтата во Русија.
Напнатост на двете страни
Во рускиот пограничен регион Белгород, украински дрон го погодил електроенергетски објект, предизвикувајќи прекин на струјата. Москва, пак, го обвини Киев за оштетување на неактивен цевковод за амонијак, тврдејќи дека дошло до испуштање на токсичен гас.
Украинските власти од регионoт Донецк соопштија дека инцидентот „не претставува закана за животите на граѓаните“, но додадоа дека ситуацијата останува напната долж целата линија на фронтот.
