Ирис Шталцер (57), новоизбраната градоначалничка на Хередеке во индустрискиот регион Рур, е во животна опасност откако беше нападната и избодена повеќепати пред својот дом, објавија германските медиуми Билд, Велт, Фокус и т-онлајн.
Сталцер, членка на Германската Социјалдемократска партија (СПД), беше пронајдена од својот син во неделата вечерта, сериозно повредена, со најмалку 13 убодни рани во стомакот и градите. Напаѓачите, според сведоци, биле неколку мажи, кои сè уште се наоѓаат во бегство.
Локалната полиција во Хаген спроведува голема операција и претрес, но мотивот за нападот засега е непознат. Се разгледуваат неколку можни верзии, вклучувајќи и политички мотивиран обид за атентат.
Сталцер победи на изборите на 28 септември со 52,2% од гласовите и требаше да ја преземе функцијата во ноември. Таа е адвокат по професија, мажена и мајка на две тинејџерски деца.
Нападот предизвика вознемиреност кај германските политичари. Министерот за внатрешни работи на Северна Рајна-Вестфалија, Херберт Ројл, го оцени инцидентот како „ужасен чин на насилство против демократски избран претставник“, додека генералниот секретар на СПД, Кевин Кунерт, предупреди дека омразата кон политичарите станува реална закана за нивните животи.
Случајот потсетува на убиството на Валтер Либке во 2019 година и ја потврдува загриженоста за растечкото насилство против локални функционери во Германија. Сталцер останува на интензивна нега, а истрагата ја води обвинителството во Дортмунд. Германските медиуми предупредуваат дека нападот може да има сериозни последици за безбедноста на локалните власти низ целата земја.
