Кандидатката за градоначалник на Скопје од редовите на СДСМ, Каја Шукова, остро ги отфрли тврдењата на Орце Ѓорѓиевски од ВМРО-ДПМНЕ дека наводно се понудила за директорка на ЈП „Комунална хигиена“ доколку тој победи на изборите.
„Не сум размислувала на таа тема, имам друга задача – тука сум да победам и да им овозможам на граѓаните современо, чисто и зелено Скопје“, рече Шукова, нагласувајќи дека нејзината цел е градоначалничката функција, а не директорска позиција.
Изјавата доаѓа како реакција на вчерашните коментари на Ѓорѓиевски, кој најави дека е подготвен да вклучи луѓе и од спротивниот табор доколку имаат квалитетни идеи. Тој изјави дека Горан Марковски би можел да биде негов советник, а за Шукова додаде: „Мислам дека самата се понуди за директор на ‘Комунална хигиена’. Ако се покаже како најдобар кандидат, можеби ќе биде поставена“.
Со својот демант, Шукова јасно стави до знаење дека во кампањата оди со целосна амбиција да ја освои градоначалничката функција.
