Претседателот на САД, Доналд Трамп, објави дека трговијата со соја ќе биде клучна тема на неговиот претстојен состанок со кинескиот претседател Си Џинпинг, кој е закажан за четири недели.
„Ќе се сретнам со претседателот Си од Кина за четири недели, а сојата ќе биде главна тема на разговорот“, напиша Трамп на социјалната мрежа Truth Social. Тој истакна дека американските земјоделци трпат загуби поради тоа што Кина, „само поради преговарачки причини“, го запрела купувањето на земјоделски производи од САД.
Трамп најави дека дел од приходите собрани од царините на кинескиот увоз ќе бидат искористени за помош на земјоделците кои се соочуваат со проблеми. „Заработивме многу пари од царините и ќе земеме мал дел од тие средства за да им помогнеме на нашите земјоделци. Никогаш нема да ги изневерам нашите земјоделци“, истакна тој.
