Рускиот амбасадор во Франција, Алексеј Мешков, изјави дека евентуално соборување на руски авион во воздушниот простор на НАТО би значело војна, нагласувајќи ја сериозноста на зголемените тензии меѓу Москва и земјите-членки на Алијансата. Последните инциденти, вклучувајќи упади на дронови во Полска и Романија и нарушување на воздушниот простор на Естонија од руски борбени авиони, дополнително ја заострија веќе напнатата ситуација.
Експертите, меѓу кои и поранешниот американски амбасадор при НАТО Иво Далдер, предупредуваат дека Европа веќе се наоѓа во фактичка војна со Русија, иако тоа не е официјално признаено. Русија, според нив, користи Украина како посредник за да ги тестира одбранбените капацитети на Европа, да ги ослаби евроатлантските односи и да ја намали јавната поддршка за украинската одбрана.
Извештајот на Меѓународниот институт за стратешки студии (IISS) покажува дека бројот на руски напади врз инфраструктурата во Европа се зголемил по почетокот на целосната инвазија во Украина, со цел да се ослабне логистичката поддршка за Киев. Како што нагласуваат експертите, европските држави мора да преземат конкретни мерки, вклучително проширување на воздушната одбрана, заштита на клучни објекти и поддршка на Украина со современо оружје.
Далдер заклучува дека, без оглед дали Европа сака да го признае тоа или не, таа веќе е во војна со Русија и е време да се прифати таа реалност и да се делува во согласност со неа.
