Шпанија ќе испрати воен брод за заштита на хуманитарната флота со европски активисти која беше нападната од Израел во обид да достави помош за жителите на опколениот Појас Газа, изјави шпанскиот премиер Педро Санчез.
„Шпанија бара почитување на меѓународното право и правото на нашите граѓани безбедно да пловат низ Медитеранот“, порача Санчез од Њујорк, каде што учествува на Генералното собрание на ОН. Воениот брод наскоро ќе отплови од шпанското пристаниште Картагена за да обезбеди безбедност на учесниците во флотилата и да интервенира во случај на потреба.
Флотилата „Global Sumud“, составена од помали бродови што испловија од медитерански пристаништа, има за цел ненасилно да ја прекине израелската окупација и блокада на Газа. Во конвојот се наоѓа и поранешната градоначалничка на Барселона, Ада Колау, која сведочи дека израелската војска ја нападнала флотилата во близина на Крит со дронови и експлозии. „Многу се исплашивме. Одеднаш се појавија дронови кои летаа ниско и се слушнаа силни експлозии“, изјави таа.
Потпретседателката на шпанската влада, Јоланда Дијас, оцени дека хуманитарната флота претставува „трачок надеж што мора да се заштити“, имајќи предвид дека Израел не дозволува влез на помош ниту по копно ниту по море, додека во Појасот Газа луѓето умираат од глад, болести и исцрпеност.
Израелското Министерство за надворешни работи ја нарече флотилата „Hamas-Sumud“ и соопшти дека „Израел нема да дозволи ниту еден брод во зоната на активни борби, ниту ќе дозволи повреда на законитата поморска блокада“.
Покрај Шпанија, и Италија најави испраќање воена фрегата. Италијанската премиерка Џорџа Мелони порача дека не е предвидена употреба на сила, туку обезбедување придружба и асистенција на мисијата.
