Руски воен авион прелета над германска фрегата во Балтичкото Море, соопшти денеска германскиот министер за одбрана Борис Писториус. Тој оцени дека ваквите акции, заедно со упади на руски беспилотни летала и борбени авиони во полски и естонски воздушен простор, претставуваат „дословно тестирање на границите на НАТО“.
„Прелетите над нашите бродови се непотребна провокација. Русија се обидува да ги идентификува и искористи наводните слабости на НАТО, но се лажат ако мислат дека ќе нѐ поделат“, рече Писториус пред пратениците во Бундестагот.
Министерот истакна дека одговорот на НАТО е јасен и единствен, со одлучност, но и со неопходна смиреност. Тој го презентираше и предлогот за буџетот на министерството за одбрана за 2026 година, кој предвидува 82,69 милијарди евра редовни средства и дополнителни 25,51 милијарди евра за специјален воен фонд, настанат по руската инвазија на Украина.
