Американскиот државен секретар Марко Рубио предупреди дека рускиот претседател Владимир Путин и понатаму се држи до своите цели во Украина и повика европските земји на поцврста акција, особено во однос на санкциите.
„Мислам дека отсекогаш сме знаеле дека неговите намери се да го земе Доњецк и тој беше многу отворен за тоа. Ние сме единствената земја во светот што може да разговара и со Украина и со Русија, но во одреден момент таа улога може да заврши,“ изјави Рубио во интервју за NBC News.
Тој нагласи дека постојат европски земји кои сè уште купуваат „огромни количини“ на руска нафта и гас, што според него е апсурдно. „Тие бараат од САД да воведат повеќе санкции, но самите не прават доволно. Европа мора да направи повеќе,“ порача Рубио.
Во врска со американската политика, Рубио изјави дека претседателот Доналд Трамп има способност и волја да преземе дополнителни чекори, со цел да се стави крај на конфликтот. „Трамп ја наследи оваа војна и сè што сака е да ја заврши. Тој ќе направи сè што може за да ѝ даде шанса на мирот,“ нагласи тој.
Рубио предупреди дека доколку санкциите се заострат, а Русија не прифати понуда за компромис, постои ризик војната да продолжи уште две години со стотици илјади жртви. „Се надеваме дека ќе го избегнеме тоа, но зависи од Путин,“ додаде тој.
Тој го критикуваше и поранешниот претседател Џо Бајден, велејќи дека неговата администрација „немала план за војната“, додека сегашната политика на Трамп е насочена кон барање начин за завршување на конфликтот.
