Првиот вицепремиер и министер за животна средина и просторно планирање, Изет Меџити, синоќа го посети скопското село Страчинце и се сретна со жителите кои со недели протестираат против отворањето на каменолом во нивната близина.
Меџити ги информираше дека министерството донело негативна одлука по барањето за започнување со работа на каменоломот, оценувајќи дека ваквата активност би имала сериозно негативно влијание врз животната средина, ризик од поплави, како и врз здравјето на жителите.
„Ова е долгоочекувана вест за жителите на Страчинце, кои со години се загрижени за можните последици од каменоломот. Конечно, институциите ја ставија заедницата и здравјето на луѓето на прво место“, изјави Меџити.
Тој додаде дека дозволата за работа на каменоломот била издадена пред неколку години од претходните влади, но оти Владата сега е подготвена да го затвори ова прашање. Следниот чекор, според него, е конечно поништување на концесијата, што ќе се разгледува на наредната владина седница.
Покрај ова, Меџити најави ангажман за пошумување и санација на регионот со цел враќање на природниот баланс.
