Естонија соопшти дека три руски авиони МиГ-31 во четвртокот го нарушиле нејзиниот воздушен простор и таму останале 12 минути. Според естонскиот министер за надворешни работи Маргус Цахкна, ова е четврто нарушување годинава и „невидено дрско“. Авионите биле пресретнати од италијански Ф-35, стационирани во Емарија.
Литванската министерка за одбрана Довиле Шакалиене потсети на 2015 година, кога Турција собори руски Су-24 поради повреда на воздушниот простор. Таа порача дека НАТО мора сериозно да го сфати тестирањето на својата североисточна граница.
Инцидентот во 2015 се случи на турско-сириската граница, кога турски Ф-16 собори руски авион кој, според Анкара, влегол два километри во турска територија и игнорирал повеќекратни предупредувања. Москва, пак, тврдеше дека летал исклучиво над Сирија.
Од двочлениот екипаж на Су-24, пилотот Олег Пешков беше убиен од сириски бунтовници при падобранско спуштање, а навигаторот Константин Мурахтин беше спасен. При спасувачката операција загина и руски маринец.
Инцидентот предизвика жестока дипломатска криза меѓу Москва и Анкара, со обвинувања од Путин дека нападот бил „заседа“ и дека САД знаеле за летот, што Вашингтон категорично го негираше.
