Американската вселенска агенција НАСА им забрани пристап на кинеските државјани, дури и оние со важечки американски визи, спречувајќи ги да работат во истражувачките центри на агенцијата. Кинеските граѓани, кои досега можеле да придонесуваат како изведувачи или студенти, на 5 септември дознале дека го изгубиле целиот пристап до системите и постројките на НАСА, објави „Блумберг“.
НАСА потврди дека на кинеските државјани ќе им биде ограничено користењето на објектите, материјалите и мрежите на агенцијата заради безбедност. Одлуката доаѓа во време кога забрзаната вселенска програма на Кина ги загрижува САД и ја засилува вселенската трка помеѓу двете најголеми светски економии.
Кинеските астронаути се веќе исклучени од Меѓународната вселенска станица поради забраната на Вашингтон за споделување податоци со Кина. На сослушувањето во Сенатот, пратениците нагласија дека САД мора да стигнат на Месечината пред Кина. Републиканскиот сенатор Тед Круз предупреди: „Ако нашите противници постигнат доминантни вселенски капацитети, тоа би претставувало голем ризик за Америка. Влоговите не можат да бидат поголеми.“
