Во Непал оваа недела се одржаа масовни протести во кои загинаа над 20 лица, а десетици илјади демонстранти излегоа на улиците, особено во Катманду. Полицијата употреби солзавец и гумени куршуми, а за да се спречи понатамошен хаос беше распоредена армијата и воведен полициски час.
Протестите се нарекуваат „движење на Генерацијата Z“, бидејќи предводени се од млади Непалци родени помеѓу 1996 и 2012 година, кои се мобилизираа преку социјалните мрежи, дури и по забраната на 26 платформи, вклучувајќи Facebook, Instagram, YouTube и WhatsApp. Забраната, како што тврди владата, била за сузбивање на сајбер-криминалот, но младите ја доживеаја како напад врз нивната дигитална слобода.
И покрај укинувањето на забраната, незадоволството продолжи. Протестите се реакција на долгогодишната корупција, привилегиите на политичките елити, неефикасното гонење на корумпираните и високата невработеност кај младите – над 20%, што ги тера илјадници да бараат работа во странство.
Демонстрантите ја критикуваа владата за неуспехот да создаде економски можности и ја истакнаа потребата од транспарентност, меритократија и одговорност. Слоганите како „Непал ни припаѓа“ и „КП, крадецу“ ја отсликуваат генерациската борба за промени.
За разлика од традиционалните движења, ова беше децентрализирано, водено од студенти и онлајн заедници како „Следната генерација Непал“, кои ја искористија дигиталната технологија за да се организираат и мобилизираат.
