Француската влада не успеа да го преживее гласањето за доверба во парламентот, што ја турна земјата во нова политичка неизвесност. Премиерот Франсоа Бајру самиот побара гласање, надевајќи се дека ќе обезбеди поддршка за неговата политика на намалување на јавните трошоци и стабилизирање на државниот долг.
По изгласувањето на недоверба, крајно левичарската партија „Непокорена Франција“ побара оставка од претседателот Емануел Макрон. „Бајру сакаше момент на вистина и го доби. Но резултатот покажа дека само една третина од парламентот му ја даде доверба. Тоа е пораз за политиката на Макрон во служба на богатите“, изјави Матилд Пано, лидерка на партијата.
Гласањето претставува тежок удар за втората по големина економија во Европа. Макрон сега е принуден за само една година да назначи четврти премиер.
