Во ноќниот руски напад врз Киев, во кој беа убиени три лица, меѓу нив и едно дете, а повредени најмалку 18, изгореа бројни објекти, вклучувајќи го и седиштето на украинската влада, соопштија властите во неделата.
Украинската премиерка Јулија Свириденко потврди дека главната владина зграда е сериозно оштетена за првпат од почетокот на војната, додека пожарникарите се уште се борат со пламените.
Според Воздухопловните сили на Украина, Русија лансирала 805 беспилотни летала и 13 ракети во текот на нападот. Градоначалникот на Киев, Виталиј Кличко, соопшти дека нападот започнал со бран беспилотни летала, проследен со ракетирање, што предизвикало пожари во центарот на градот и уништило повеќе станбени згради.
Службите за вонредни ситуации јавуваат за делумно уништени објекти во неколку окрузи на Киев, а чад и урнатини се издигаа над главниот град.
Украинските власти обвинија дека Русија „свесно и намерно“ гаѓала цивилни цели. Истовремено, напади беа пријавени и во Кременчук, Криви Рог и Одеса, каде што беа погодени станбени згради и инфраструктура.
Полска соопшти дека активирала свои и сојузнички авиони за да ја зајакне воздушната безбедност, поради опасноста од проширување на нападите кон западна Украина.
