Израел ќе престане со доставување пакети хуманитарна помош во градот Газа во следните денови, јави израелскиот јавен сервис KAN во петок. Исто така, ќе се намали протокот на помош во северниот дел на Појасот, со цел да се испрати јасна порака до цивилите да почнат со евакуација кон југ, пред планираната воена инвазија.
Според извештајот, околу 800.000 луѓе во градот треба да се евакуираат. Израелската армија (IDF) најави дека ќе преземе контрола над градот пред Рош Хашана (еврејската Нова година), со мобилизација на десетици илјади резервисти, а операцијата би можела да трае два до три месеци.
Во петок наутро, IDF го прогласи градот Газа за целосна воена зона, укинувајќи ја било каквата заштита која претходно ја нудеше за невладини организации.
Од октомври 2023 година, израелските сили во Газа усмртиле повеќе од 63.000 Палестинци, при што голем дел од енклвата е уништена. Обвиненија за воени злосторства, создавање вештачки глад и етничко чистење доведоа до издавање на меѓународни наредби за апсење на израелскиот премиер Бенјамин Нетанјаху и поранешниот министер за одбрана Јоав Галант.
