ВЛЕН: Коридор 8 ќе го поврзе Скопје со Тирана и Драч

Владата предводена од ВЛЕН преку Министерството за транспорт и врски покажува историска решителност за понатамошната изградба на Железничкиот Коридор 8, отворајќи ново поглавје за економски развој и регионална интеграција.

Со одлука на Владата е одобрен грант во износ од 3,7 милиони евра обезбеден од Европската инвестициска банка, кој ќе биде наменет за изработка на нова проектна документација и спроведување на постапката за тендер. Паралелно, Јавното претпријатие за железничка инфраструктура ја започна постапката за избор на Надзор на градбата, со цел да се гарантира ефикасност и транспарентност во секој чекор.

Заменик-министерката за транспорт, Калтрина Зеколи Шаќири, потенцира дека Министерството е целосно посветено на унапредување на железничките проекти како клучна алка за економски раст, регионална соработка и национална интеграција.

„Изградбата и модернизацијата на железничката мрежа не е само приоритет, туку и реалност што веќе се остварува. Коридорот 8 ќе ги поврзе Албанците од Скопје до Тирана и Драч, ставајќи ја нашата држава во центарот на европските транспортни коридори и отворајќи нови перспективи за Балканот“, порачаа од ВЛЕН.

Коридорот 8 се гледа како стратешка транспортна артерија, која не претставува само линии на карта, туку вистински мотор за развој, конкурентна економија и современи стандарди во транспортот, со кои земјата ќе стане силно поврзана со Албанија и Европа.