Делови од Словенија се погодени од силна бура и обилни врнежи од дожд кои започнаа утринава и продолжуваат и денес. Југозападниот дел од Приморје, долж границата со Хрватска, е најтешко погоден – вода се излева по улиците, куќите се поплавени, а сообраќајот е прекинат на одредени патни правци.
Реките Драгоња и Бадашевица излегоа од своите корита, а метеоролошките служби предупредуваат на продолжување на врнежите и можност за брзо зголемување на поројните води. На некои места паднале повеќе од 150 мм дожд, а условите на теренот се исклучително опасни.
Невремето предизвика лизгања на земјиштето и оштетување на патишта, особено во областа Копер, а пожарникарите регистрирале околу 70 интервенции до 10 часот наутро. Општината Копер ги повика жителите да ги преместат возилата од ниските подрачја и понуди бесплатен паркинг во неколку гаражи.
Невремето се прошири и на Хрватска, каде силен дожд со грмотевици ја зафати областа на Загреб. Црвен метеоролошки аларм е издаден за регионите Книн, Риека и Сплит, додека остатокот од земјата е ставен под портокалов аларм поради можност за грмотевици и силни ветрови.
