Премиерот на јеменското движење Хути, Ахмед ал-Рахави, наводно е убиен во израелски воздушен напад врз главниот град Сана, пренесоа јеменските медиуми Ал-Џумхурија и Аден ал-Гад. Според извештаите, била погодена зградата во која се наоѓал премиерот, а со него загинале и неколку соработници. Израел досега не ја потврдил информацијата.
Одделно, израелски канали јавуваат дека уште еден напад бил насочен кон група од десет високи министри на Хутите кои се собрале надвор од Сана за да го следат говорот на нивниот лидер Абдул-Малик ал-Хути. Исходот не е целосно познат, но политички извори тврдат дека е „елиминиран голем дел од политичко-воениот врв“ на движењето.
Како можни жртви се споменуваат министерот за одбрана Мухамед Насер ал-Атафи, кој има блиски врски со иранската Револуционерна гарда и Хезболах, и началникот на Генералштабот Мухамед ал-Гамари, кој и претходно бил ранет во израелски напад.
Хутите, пак, ги отфрлаат тврдењата, нагласувајќи дека Израел напаѓа цивилни цели и народот на Јемен поради нивната поддршка за Газа.
Ова е 16-ти израелски напад врз позиции на Хутите во Јемен од почетокот на конфликтот, земја оддалечена околу 1.800 километри од Израел.
