Бројот на загинати по руското ракетирање на Киев синоќа порасна на најмалку 21 лице, соопшти Државната служба за итни ситуации на Украина, пренесе Sky News. Меѓу жртвите има и четири деца, вклучувајќи и двегодишно.
Нападот предизвика значителна материјална штета, а оштетени се и просториите на Делегацијата на Европската унија и на Британскиот совет во украинската престолнина.
И покрај сериозноста на нападот, портпаролката на американскиот претседател Доналд Трамп, Каролин Левит, на брифингот во Белата куќа не го спомена инцидентот, туку се задржа на внатрешни американски прашања.
Одговарајќи на новинарско прашање, Левит изјави дека претседателот Трамп „не е среќен, но и не е изненаден“ од нападот. „Тоа се две земји кои одамна се во војна. Русија го изврши овој напад врз Киев, а од друга страна, Украина неодамна нанесе удари врз руски нафтени рафинерии,“ рече таа.
Таа нагласи дека американскиот претседател останува на ставот дека сака крај на војната, но „и лидерите на двете земји мора да покажат волја за прекин на судирот“.
