Два италијански Ф-35, распоредени во рамките на НАТО мисијата за надзор на воздушниот простор на Балтикот, вчера полетаа од базата Емари во Естонија за да пресретнат руски воен авион. Станува збор за т.н. „скрембл“ – итно пресретнување, кое според соопштението на сојузничката команда ја покажува подготвеноста на НАТО да го штити својот воздушен простор и своите членки на источното крило.
Ова не е прв ваков случај оваа година. На 11 август италијански Ф-35 реагираше на сличен инцидент, кога центарот за операции на НАТО од Германија нареди интервенција поради неидентификувано летало во меѓународниот воздушен простор над Балтикот.
Мисијата „Air Policing“ на НАТО е воспоставена уште во 2004 година со цел постојана заштита на воздушниот простор на сојузниците, особено на Естонија, Летонија и Литванија, кои немаат сопствени борбени авиони. По руската анексија на Крим во 2014 година, мисијата е дополнително зајакната на источното крило на Алијансата.
Активностите на италијанските Ф-35, базирани во Емари, се координираат од италијанскиот врховен команден штаб (COVI) во соработка со НАТО командата во Рамштајн.
