Американскиот претседател Доналд Трамп во Белата куќа изјави дека Владимир Путин прифатил Русија да одобри безбедносни гаранции за Украина – став што претставува радикален пресврт, бидејќи Кремљ со години го отфрлаше секое формално западно ветување за заштита на Киев.
Се разгледува модел сличен на Членот 5 од НАТО, според кој напад врз една држава претставува напад врз сите. Сепак, Трамп остави отворено прашање дали САД би испратиле трупи, нагласувајќи дека Европа ќе мора да ја преземе поголемата тежина.
Поранешниот руски дипломат Борис Бондарев смета дека Украина може да смета на вистинска безбедност само ако во земјата бидат распоредени 50.000–100.000 странски војници со комплетна инфраструктура, пред сè американски.
Во меѓувреме, европските лидери изразија различни позиции – германскиот канцелар Фридрих Мерц бара прекин на огнот како предуслов за разговори, додека францускиот претседател Емануел Макрон предложи дури и „квадрилатерален“ формат на преговори. Урсула фон дер Лајен и Џорџа Мелони зборуваа за гаранции „по НАТО-модел“, а финскиот претседател Александар Стуб оцени дека напредокот е најголем во последните три години.
Зеленски настапи воздржано и дипломатски, избирајќи стратегија на кратки одговори. Но иако беше пречекан посрдечно отколку во февруари, останува неизвесно дали од Вашингтон излезе со подобри услови.
Клучното прашање, велат аналитичарите, е дали САД и Европа ќе го принудат Зеленски на територијални отстапки кон Русија во замена за мир – сценарио кое би ја променило безбедносната карта на Украина.
