Европските фабрики за оружје се шируваат трипати побрзо од вообичаеното мирновремено темпо, достигнувајќи површина од над 7 милиони квадратни метри, што го одразува историскиот раст на одбранбеното производство, покажува анализа на „Фајненшл тајмс“ базирана на сателитски податоци од 150 локации на 37 одбранбени компании.
Овој забрзан развој е директна последица на целосната руска инвазија врз Украина во 2022 година. Владите на Европската Унија се обидуваат да ги зголемат залихите на муниција и оружје, додека продолжуваат да ја поддржуваат украинската армија, со оглед на неизвесноста околу заложбите на САД.
Со повеќе од 1.000 радарски снимки, „Фајненшл тајмс“ забележа дека околу една третина од фабриките за муниција и ракети бележат проширување или градежни активности, што укажува на промена од традиционалниот „точно на време“ модел кон изградба на поотпорна индустриска база.
Еден од најголемите проекти е заедничката фабрика за муниција и експлозиви во Варпалота, Унгарија, која ја водат германскиот одбранбен гигант Рајнметал и унгарската државна компанија Н7 Холдинг.
Во рамките на програмата на ЕУ „Закон за поддршка на производството на муниција“ (ASAP), веќе се инвестирани 500 милиони евра за зголемување на производствените капацитети, а планирани се нови инвестиции и програми.
Комесарот за одбрана на ЕУ, Ендру Кубилиус, истакна дека капацитетот за производство на муниција во Европа се зголемил од 300.000 во 2022 година на проектирани 2 милиони до крајот на 2025 година, при што фабриките на „Рајнметал“ значително го зголемуваат производството на гранати од 150 мм.
Во моментов се воде преговори за нова програма вредна 1,5 милијарди евра која ќе продолжи да ја поддржува оваа експанзија и ќе овозможи заедничка набавка на одбранбена опрема. Дополнително, ЕК разгледува можности за проширување на слични мерки и во други индустриски сектори, вклучувајќи ракети, воздушна одбрана, артилерија и беспилотни летала.
