Ал Џезира денес соопшти дека пет члена на нејзината новинска екипа, меѓу кои и истакнатиот новинар Анас ал-Шариф (28), се убиени синоќа во израелски воздушен напад во близина на болницата Ал-Шида во градот Газа.
Телевизиската мрежа го осуди нападот, нарекувајќи го „очаен обид за замолчување на гласовите што ја разоткриваат окупацијата и преземањето на Газа“. Ал-Шариф, заедно со дописникот Мохамед Креикех и снимателите Ибрахим Захер, Мохамед Нуфал и Моамен Али, биле во новинарски шатор до главната порта на болницата кога бил извршен ударот.
„Ова целно убиство е уште еден јасен, планиран напад врз слободата на медиумите“, се наведува во соопштението.
Израелските одбранбени сили (ИДФ) потврдија дека го нападнале Ал-Шариф, тврдејќи дека тој бил „шеф на терористичка ќелија во Хамас“ и „охрабрил ракетни напади врз израелски цивили и војници“. Комитетот за заштита на новинарите (CPJ) изјави дека е шокиран и дека Израел не понудил докази за обвинувањата.
Вишиот уредник на Ал Џезира, Моханед Моавад, изјави за Би-Би-Си дека Ал-Шариф бил акредитиран новинар и „единствениот глас“ кој му овозможувал на светот да знае што се случува во Газа. „Тие беа погодени во шатор, додека известуваа од фронтовската линија“, рече Моавад, додавајќи дека целта на израелската влада е замолчување на извештаите од Газа.
